Tradicionalna beranska manifestacija „Šlaufijada“, koja je bila zapostavljena u protekloj deceniji, oživljena je 5. avgusta 2012. godine, kao dio festivala „Još me ima“ i u okviru proslave 150 godina Berana. Sve generacije su bile uključene u organizaciju događaja – stariji sugrađani su prenijeli svoja iskustva mlađima i naučili ih kako da organizuju tradicionalne segmente ove manifestacije.

Tako je dobro poznati prizor beranske omladine koja plovi Limom na starim kamionskim gumama, takmičeći se za prvo mjesto, umnogome podsjetio na iskustva njihovih očeva iz nekadašnjih vremena. Dok se na rijeci odvijala trka, u glavnom gradskom parku kuvari iz lokalnih restorana i iskusni ribolovci nadmetali su se u pripremanju najukusnije riblje čorbe. U večernjim satima, maskirana djeca, mladi i brojni drugi građani prošetali su centrom grada, a krunu večeri predstavljao je maskenbal koji je okupio sve generacije i ponovo probudio onaj uspavani duh Berana od nekada.